Джамалова Гульзат Турарбековна
Кентау көпсалалы колледжі, ОҚО, Кентау қаласы тарих пәнінің оқытушысы

Сабақтың мақсаттары:

Білімділік: Кеңестік Социалистік Республикалар Одағының қоғамдық дамуы, халқының саяси әлеуметтік жағдайы, көсемдерінің жүргізген саясаты,  КСРО ның ыдырап, ТМД ның құрылуы туралы түсіндіру.

Тәрбиелік: Білімге құштарлығын арттыру, отаншылдыққа, ынтымақ, бейбітшілікке тәрбиелеу, өз пікірін жеткізу арқылы берілген тапсырманы орындай алады

Дамытушылық: Есте сақтау қабілетін дамыту, өз бетімен әрекет етуге, ғылыми тұжырымдарға өз пікірін қоса білуге, фактілерді дәлме дәл келтіре білуге үйрету. Жеке қабілеттеріне, деңгейлеріне қарай берілген тапсырмаларды орындайды және сұрақтарға жауап береді

Сабақтың көрнекі-құралдары: КСРО картасы, Дүние жүзінің саяси картасы, интерактивті тақта , сызбалар, үлестірме қағаздар

Оқыту тәсілдері:  СТО стратегиялары, сұрақ жауап,ой қозғау , сыни тұрғыдан ойлау әдістерін сабақ барысында қолдану және оқытудың жаңа әдістерін сабақ барысында қолдану
Пәнаралық байланыс: тарих, география, саясаттану, мәдениеттану

Әдебиеттер тізімі:

Негізгі:

1. Г.Д.Сүгірбаева, О.С.Сороко-Цюпа, В.П.Смирнов, А.И.Строганов. XX гасыр дүниежүзі.  11 сынып Алматы «Дрофа » 2005ж

2.  Қ.Қожахметүлы, Ә. Шүпеков. М.Ғүбайдулина. М.Дәкенов. Дүние жүзі тарихы. (1941-1945жж). 10 сынып Алматы «Мекіеп»2006

Қосымша:

1.  Т.С.Садықов, P.P. Қайырбекова, С.В.Тимченко. Дүние жүзі тарихы. 11 сынып Алматы «Мектеп» 2007.

Сабақтың барысы мен мазмұны

1. Ұйымдастыру кезеңі 3-5 мин, ( сәлемдесу, түгелдеу, студенттердің зейінін сабаққа аудару) оқушылардың қатысуын тексеру,аудитория тазалығын қадағалау, оқушылардың назарын сабаққа аудару

2. Сабақтың мақсатын хабарлау

жасалатын әрекеттер

–  топқа бөлу

–  слайдтармен жұмыс

–  пысықтау,бекіту,топпен жұмыс (топ басшылары, топ мүшелері берілген  сұрақтарға жауап береді )

– картамен жұмыс

–  оқытушының қорытынды сөзі

Бүгінгі тақырыпта КСРО ның Қырғи қабақ соғысы, Жылымық, Тоқырау және Қайта құру дәуіріндегі қоғамдық саяси өміріне тоқталамыз. Бүгінгі тақырыбымызды өткен тақырыппен байланыстыру үшін мына сұрақтарға жауап беріп көріндер:

1.КСРО ның құрылуы

2. Конституцияның қабылдануы

3. Соцалистік қоғамды дамытудың лениндік үш бағыты: (индустрияландыру, ЖЭС, ұжымдастыру)

3.  Үй тапсырмасын тексеру  15-20 мин.

Оқушылардың білімін сұрақтар арқылы бақылау

1. Париж бітім коныеренциясы

2. ГДР мен ГФР-дің құрылуы

3. Ұжымдық қауіпсіздік идеясы

4. Қырғи қабақ соғысы кезіндегі дау-жанжалдар

4. Жаңа сабақтың тақырыбы мен оқушылар алдында тұрған мәселелерді хабарлау

Кеңестік Социалистік Республикалар Одағы (Кеңес Одағы, КСРО) – Еуропада 1922 жылдан 1991 жылға дейiн және Азияда өмір сүрген мемлекет.

5. Өткен білімдерге сүйене отырып, оқу әрекетін дамыту.

Мақсаты  КСРО және посткеңестік Еуропа елдері КСРО –ның сыртқы саясаты туралы тақырыппен таныса отырып, елдегі сол кезеңдегі саяси режімнің түрлерін біледі және ажырата алады КСРО 1945-1964 жж. Соғыстың зардаптары Соғыстан кейінгі кезеңдегі елдегі киындықтар одан шығу жолдары елдегі саяси үрдістер туралы тақырыппен кең түрде таныса отырып меңгереді.
Өз пікірін жеткізу арқылы берілген тапсырманы орындай алады
Жаңа сабақты түсіндіру іскерлік, дағдыларды дамыту.   50-55 мин.

Кеңес Одағы, Кеңестік Социалистік Республикалар Одағы, КСРО – бұрынғы Ресей империясы аумағының шегінде 1922 – 91 ж. болған мемлекет атауы. 1917 жылғы Қазан төңкерісі нәтижесінде коммунистер (большевиктер) мемл. билікті өз қолдарына алған соң, бұрынғы Ресей империясы құрамындағы неғұрлым дамыған ұлттық құрылымдар (Польша, Финляндия, Балтық теңізі жағалауы елдері) дербес мемлекет болып бөлініп шықты. 1918 ж. қаңтарда өткен Жұмысшы, солдат және шаруа кеңестерінің (бұдан әрі кеңестер деп аталады) біріккен съезінде “Еңбекші және қаналған халықтардың декларациясы” жарияланды. Езілген ұлттарға өз республикаларын құруға мүмкіндік берілді.  1918 ж. 4 – 10 шілдедегі Кеңестердің 5-Бүкілресей съезінде Ресей Кеңестік Федеративтік Социалистік Республикасының (РКФСР) тұңғыш Конституциясы қабылданды. 1919 ж. наурызда мемл. билік басындағы Ресей Коммунистік(большевиктер) партиясының РК(б)П жаңа бағдарламасы қабылданып, елде социализм орнату жолдары белгіленді. Бағдарламаға сәйкес ішкі және сыртқы контрреволюциямен күресу үшін 1919 ж. маусымда Ресей, Украина, Белоруссиядағы кеңестер билігін (қ. Кеңес өкіметі) жақтайтын мемл. органдардың әскери, саяси, шаруашылық одағы қалыптасты. 1918 ж. 30 сәуірде Түркістан автономиялық кеңестік социалистік республикасы (Түркістан АКСР-і), 1920 ж. 26 сәуірде Хорезм халық кеңестік республикасы, 1920 ж. 8 қазанда Бұхар халық кеңестік республикасы, 1920 ж. 4 қазанда Қазақ автономиялық кеңестік социалистік республикасы (Қазақ АКСР-і) құрылды. Қызыл армияның Кавказға жорығы нәтижесінде ондағы ұлттық үкіметтер құлатылып, Әзірбайжан кеңестік социалистік республикасы (28.04.1920), Армян кеңестік социалистік республикасы (29.11.1920), Грузин кеңестік социалистік республикасы (25.02.1921) жарияланды. 1922 ж. 12 наурызда осы үш республика бір федеративтік одаққа (Закавказье Соц. Кеңестік Республикалардың федеративтік одағы, ЗСКРФО) бірікті де, сол жылдың аяғына қарай (13.12. 1922), Кеңестердің 1-Закавказье съезінде ЗСКРФО біртұтас Закавказье Социалистік Федеративті Кеңес Республикасы (ЗСФКР) түріне айналдырылды, әрі оған кірген республикалар дербестігін сақтайтын болды. Ресей мен Жапония арасында болуы ықтимал әскери қақтығыстың алдын алу және ақ гвардияшыларды, интервенцияны жоюға жағдай туғызу мақсатында 6.4.1920 ж. жарияланған Қиыр Шығыс республикасы, алға қойылған мақсат орындалған соң, 15.11.1922 ж. ВЦИК декретімен барша жері РКФСР-ге оның құрамдас бөлігі ретінде қосылды. 1922 жылдың ортасына таман бұрынғы Ресей империясының барлық жерінде дерлік кеңестер билігі орнады. Мемл. құрылымды одан әрі жетілдіру үшін, билік басындағы коммунистер (большевиктер) партиясының жетекшісі В.И. Лениннің жоспары бойынша, кеңестік республикалардың одағын құру керек болды. Жаңа одаққа кіретін республикалар тәуелсіз және тең құқылы болып саналды. РКФСР, УКСР, БКСР, ЗСФКР Кеңестерінің кезекті съездері одаққа бірігуді жақтап дауыс берді. Осыны негізге ала отырып, 1922 ж. 30 желтоқсанда шақырылған аталған төрт республика кеңестері өкілдерінің 1-съезі.

 

Кеңестік Социалистік Республикалар Одағын (КСРО немесе Кеңес Одағы) құру жөнінде Декларация қабылдады. Декларацияда КСРО-ға кіру теңқұқылық пен еріктілік негізінде жүзеге асырылады және Одақтан өз еркімен шығу құқы сақталады, әрі басқа да жаңадан құрылған республикалар одаққа өз еркімен кіре алады деп көрсетілді. Съезд КСРО-ны құру жөніндегі келісімшартты бекітті. Одақтың жоғарғы органын – КСРО Орталық Атқару Комитетін сайлады. ОАК-нің тең төрағалары болып М.И. Калинин, Г.И. Петровский, Н.Н. Нариманов, А.Г. Червяков сайланды. ОАК-нің 2-сессиясында Кеңес Одағының үкіметі – В.И. Ленин бастаған КСРО Халық Комиссарлар Кеңесі құрылды. 1924 ж. 31 қаңтарда 2-Кеңестер съезі КСРО-ның алғашқы Конституциясын бекітті. 20 ғ-дың 20-жылдарының бас кезінен бастап, әсіресе, Ленин қайтыс болғаннан кейін, Кеңес Одағында билік үшін талас-тартыс басталды. Бұл күресте И.В.Сталин жеңіске жетті де, елде өзінің авторитарлық жеке билігін орната бастады. 1925 ж. Өзбекстан Кеңестік Социалистік Республикасы (Өзбек КСР-і), Түрікменстан Кеңестік Социалистік Республикасы (Түрікмен КСР-і), құрылды. 20 ғ-дың 20-жылдарының ортасынан бастап Кеңес Одағы жаңа экономикалық саясаттан бас тартып, елді күшпен индустриализациялау және ауыл шаруашылығын күшпен ұжымдастыру саясатын жүргізді. Коммунистік партия мемлекеттік билікті толық қолына алды. Елде қатты орталықтандырылған әрі милитаризацияланған тоталитарлық режим орнады. Бұл жүйе елді жедел түрде модернизациялауға және басқа мемлекеттердегі рев. қозғалыстарды қолдауға қызмет етті. Ауыл шаруашылығында шаруаларды зорлықпен ұжымдастыру және ұсақ меншік иелерін (кулактарды, орта шаруаларды, ауыл байларын, т.б.) тәркілеу халықты жаппай ашаршылыққа ұшыратты. Оған қоса зорлықпен отырықшыландырылған қазақ шаруалары айрықша қатты шығынға ұшырады (қ. Көшпелі және жартылай көшпелі қазақ шаруаларын отырықшыландыру). Бұл халықтың жаппай наразылығын туғызып, жер-жерде шаруалар көтерілістері басталды. Бірақ оларды үкімет әскерлері күшпен басып тастады. 1929 жылы КСРО халық шаруашылығын дамытудың 1-бесжылдық жоспары жасалды. 1934 жылы алғашқы бесжылдық жоспарды мезгілінен бұрын орындау қорытындылары қаралып, 2-бесжылдық жоспар жасалды. Екі бесжылдық нәтижесінде өнеркәсіп өндірісінің көлемі бойынша КСРО Еуропада 1-орынға, әлемде (АҚШ-тан кейін) екінші орынға шықты. 1934 жылдың соңында КСРО бойынша жаппай саяси қуғын-сүргін басталды. Көптеген партия, мемлекет, қоғам, әскери, мәдениет қайраткерлері атылып кетті, миллиондаған тұтқындарды тегін жұмыс істету үшін еңбек лагерлері құрылды (қ. ГУЛАГ).

1936 жылы 5 желтоқсанда КСРО-ның екінші Конституциясы қабылданып, бұрынғы ЗКФСР-дан бөлінген Әзірбайжан Кеңестік Социалистік Республикасы (Әзірбайжан КСР-і), Армения Кеңестік Социалистік Республикасы (Армения КСР-і), Грузия Кеңестік Социалистік Республикасы (Грузия КСР-і), РКФСР-ден бөлінген Қазақ Кеңестік Социалистік Республикасы (Қазақ КСР-і), Қырғыз Кеңестік Социалистік Республикасы (Қырғыз КСР-і) құрылып, Кеңес Одағындағы одақтас республикалар саны көбейді. 1939 ж. кеңес-герман келісімшарты жасалынып, ол бойынша КСРО құрамына Батыс Украина мен Батыс Белоруссия, 1940 ж. Балтық теңізі жағалауы елдері, Бессарабия, Солт. Буковина зорлықпен қосылды. Осының негізінде 1940 жылы Молдовия  (Молдовия КСР-і), Латвия (Латвия КСР-і)  құрылып, Кеңес Одағы құрайтын одақтас республикалар саны 15-ке жетті. 1941 ж. жазда кеңес-герман соғысы басталды (қ. Ұлы Отан соғысы). Соғыс кезінде тұтас халықтар (балкарлар, шешендер, қалмақтар, қырым татарлары, карашайлар, месхет түріктері, немістер, т.б.) Қазақстанға, Орта Азияға, Сібірге жер аударылды. Соғыс аяқталғаннан кейін КСРО-ға Оңт. Сахалин, Куриль аралдары, Петсамо (Печенга) ауданы, Клайпеда, Кенигсберг (Калининград), т.б. территориялар қосылды. Соғыстан кейінгі жылдары саяси қуғын-сүргін қайтадан басталды (космополиттермен күрес, “Ленинград ісі”, “дәрігерлер ісі”, т.б.). Соғыс кезіндегі бұрынғы одақтастармен (АҚШ, Ұлыбритания, Франция) арада бәсеке күшейіп, “қырғи-қабақ соғыс” ахуалы қалыптаса бастады. Әлемде екі жүйе (социалистік елдер мен капиталистік елдер) пайда болып, жанталаса қарулану күшейіп кетті. 1949 ж. Семей полигонында КСРО-да тұңғыш атом қаруы сыналды. 1953 ж. көктемде Сталин қайтыс болып, үкімет билігі үшін тартыс қайта басталды. Үкімет басына келген Н.С. Хрущев партияның 20-съезінде (1956) Сталиннің жеке басына табынудың зардаптары жөнінде баяндама жасады. Саяси қуғын-сүргін құрбандары ақтала бастады. Қудалауға ұшыраған халықтардың РКФСР құрамындағы автон. құрылымдары қалпына келтірілді. Кеңес Одағы құрамында жоғарыда аталған 15 одақтас республикалардан өзге 20 автономиялық республика, 8 автономиялық облыс, 10 ұлттық округ болды. Өнеркәсіп пен ауыл шаруашылығын дамытуға үлкен көңіл бөлінді. Қазақстан мен Батыс Сібірде тың және тыңайған жерді игеру қолға алынды. 1954 ж. алғашқы атом электрстансасы салынды, 1957 ж. Жердің жасанды серігі ұшырылды, 1961 ж. тұңғыш кеңестік ғарышкер орбитаға ұшып шықты. Бірақ бұл жұмыстардың барлығы тоталитарлық жүйе тәртібімен жүргізілгендіктен, ішкі қайшылықтары көп болды.

Орыстандыру саясатының күшеюіне қарсылық ретінде ұлт республикаларында наразылықтар бой көрсетті. 1964 ж.Хрущев орнынан түсіріліп, билікке Л.И. Брежнев келді. Жаңа үкімет басшысы жүргізген реформалар ақырына дейін жеткізілмей, сәтсіздікке ұшырады. Экономика экстенсивті жолмен дамыды, елді милитаризациялау әрі қарай жалғасты. Көрші социалистік елдерде реформа жасау әрекеттері – Венгрия (1956) мен Чехословакияға (1968) қарулы әскер кіргізу арқылы басып тасталды. 1979 ж. Ауғанстанға Кеңес Одағы әскерлері кіргізілді. Жанталаса қарулану одан әрі шегіне жетті. 1977 ж. қабылданған КСРО-ның үшінші Конституциясы елдің қоғамдық-саяси өміріне, әлеуметтік-шаруашылық тұрғыда дамуына серпін бере алмады. 1980 жылдың бас кезінде Кеңес Одағы экономикалық тоқырауға ұшырады. 1985 ж. билікке М.С. Горбачев келуімен бірге елде саяси-экономикалық реформалар басталды. Кеңес жүйесін реформалауға тырысу КСРО-ны дағдарысты жағдайға алып келді.

1991 ж. желтоқсанда Минск қаласында КСРО-ның бастапқы құрылтайшылары болған одақтас республикалар Беларусь, Ресей, Украина басшылары өздерінің КСРО-ны тарататындықтарын жариялады (қ. Беловеж келісімі). Сөйтіп, КСРО өзінің өмір сүруін тоқтатты. 1991 ж. 21 желтоқсанда бұрынғы КСРО республикалары Армения, Әзірбайжан, Беларусь, Қазақстан, Қырғызстан,Тәжікстан, Түркменстан, Өзбекстан, Украина Алматы қаласында өздерінің Тәуелсіз мемлекеттер Достастығын  құратындықтары жөніндегі декларацияға қол қойды.

 

6.  Жаңа сабақты қорытындылау:

1.  Семей  полигонында КСРО-да тұңғыш атом қаруы сыналды.

2.  Үкімет басында болған көсемдер

3. Кеңес әскерлерінің Ауғаныстанға енуі. Ауған соғысы

4. Кеңес қоғамындағы тоталитарлық жүйе

5. Экономикалық тоқырау

6.  КСРО-ны тарататындықтарын жариялады (қ. Беловеж келісімі).

7. Сабақтың қорытындысын шығарып, қысқаша түсінік бере отырып бағалау.  5 мин

8. Үйге тапсырма беру 5 мин: Г.Д.Сүгірбаева, В.П.Смирнов, А.И. Строгонов, ХХ ғасыр дүние жүзі  291 бет, Ә.Шүпеков, Қ.Қожахметұлы, М.Дәкенов, М.Сембинов

Сабақтың аяқталуын хабарлау.